政情：龐愛蘭「收錯風」 着長衫摘龍眼

Scarlett就話，佢去參觀之前園方就同佢哋講，到時如果想摘龍眼就會畀個鈎佢哋，所以，佢就預計啲龍眼應該生得好高，所以如果佢淨係去食飯，就着正式啲嘅長衫都冇問題。點知佢去到先發現原來啲龍眼生得好密好低，只係到腰咁高，見到咁方便，佢都摘咗一啲，仲連鈎都慳番唔使用。

食飽即去游水消暑

Scarlett今次行程只有兩日，除咗摘龍眼返屋企曬乾做食材之外，仲去咗食烤全羊。不過呢排天氣咁熱，Scarlett都話，食嘅時候就算坐喺張櫈度唔郁都出晒汗，成件衫濕晒，有霧水風扇都搞唔掂。好在見酒店食飯嘅位置隔籬就有泳池，所以食食吓都忍唔住，快快趣食飽就過隔籬游水咁話，認真搞笑。