政情：蕭嘉怡政助榜上無名 陳學鋒封口拒評
早前有傳民建聯（民記）中西區區議員蕭嘉怡（Kathy）會出任新一屆政府政務司司長政治助理，不過喺政府早前公布嘅副局長同政助名單中，Kathy就榜上無名。同屬民記嘅中西區區議會副主席陳學鋒尋日出席活動時就被問到Kathy最新動向，陳學鋒就話︰「有咩問番佢（Kathy）本人啦！」拒絕評論。究竟係Kathy入熱廚房一事仍有程序進行，所以要封口，定係其實甩咗轆，搞到陳學鋒唔敢再提呢﹖
民記唔派人爭山頂議席
雖然未知Kathy所屬嘅中西區東華選區使唔使補選，但中西區山頂選區就肯定要補選喇，因為當區議員、自由黨陳浩濂要出任財經事務及庫務局副局長。問到民記會唔會派人參加補選，陳學鋒就話，山頂議席多年來都係由自由黨掌握，近年只有立法會議員陳淑莊曾經贏過一屆，不過之後都輸咗畀陳浩濂。加上自由黨已明言會派人重奪議席，所以民記已經決定咗唔派人爭位喎。