政情：月使10萬搞網誌Fb 波叔請人唔慳家
新一屆政府行政會議成員、金融管理局前總裁任志剛（任總）日前撰文批評政府喺過去十年一直採取「守財奴」政策，搞到政府庫房水浸，但就拖經濟後腿。雖然成篇文章都冇點名批評邊個，但擺明就係針對掌管香港庫房十年嘅前財政司司長曾俊華（鬍鬚曾）。眼見鬍鬚曾備受批評，現任財政司司長陳茂波（波叔）可能都感覺到壓力，所以就決定唔做守財奴，仲豪花逾十萬元請人搞網誌同Facebook（Fb）。不過搞網誌同Fb都每月使逾十萬元，咁樣用公帑法，唔通佢唔怕畀人話佢大花筒？
將善用盈餘 投資未來
日前任總撰文暗批鬍鬚曾，指政府過去十年一直採取守財奴政策，庫房有大量盈餘出現，拖香港經濟後腿，做法不合時宜。雖然心水清嘅都知任總嘅言論應該係針對鬍鬚曾，但波叔都唔係無動於衷食花生。波叔尋日喺電台接受訪問時就話，自己同任總早有交流，任總嘅講法亦唔係新觀點，佢自己亦都提過《基本法》對公共財政嘅要求係具有彈性，並唔係緊箍咒，不過對於任總嘅言論，佢就唔想再「加把口」咁話。不過波叔又明言，因預計未來公共開支會比較高，所以會善用大額盈餘，包括投資未來，最重要都係用得其所啫。
話口未完，波叔就被發現佢果然冇慳荷包，仲花超過十萬元去請人添。話說佢最近就透過行政署推出財政司司長辦公室兩大筍工，分別聘請一名項目經理同一名項目主任，前者月薪為五萬九千元至七萬三千元，後者月薪就介乎三萬八千元至五萬三千元。究竟份工要做啲乜？咪就係幫波叔手搞個網誌、Fb，寫吓演詞、搜集吓資料咁囉，不過求職者就最少要有五年傳媒或公共事務經驗。其實呢兩個職位上屆政府都有，不過依家出現空缺，所以就要重新招聘喎。
波叔請人搞網誌、Fb，做好同市民溝通嘅工作都係無可厚非，不過每月要花逾十萬元，係唔係用得其所就要睇過先知喇。