中環出更：答最低工資甩轆 徐英偉刨書補鑊
勞工及福利局副局長徐英偉（Caspar）履新當日會見傳媒時就畀有關最低工資及綜援金額嘅提問考起，真係甩晒轆。Caspar尋日出席活動時就再被問到有冇惡補同勞工及福利相關嘅數據，佢就立即話最低工資係三十四點五元，仲背埋各類別人士嘅綜援金額添。似乎Caspar為咗一雪前恥，真係有「刨書」補鑊噃。
Caspar為咗力證自己有溫書，尋日就主動背出現時健全六十歲或以上長者、兒童，以及三人家庭嘅正確綜援金額，被問到成人綜援金額係幾多時，佢亦都答得出。Caspar承認自己係為咗補鑊而溫書，讀咗幾頁紙，可能有啲都會唔記得，不過一啲重要嘅數字就已經記住。
同羅致光冇分歧
Caspar同勞福局局長羅致光來自唔同政治光譜，唔知合作成點呢？Caspar就話，佢哋兩個磨合得好好，又話勞福議題一向容易獲唔同黨派支持，佢同羅致光亦冇任何分歧。佢又話勞福局暫時仲未有分工，不過佢喺政府任職九年，同立法會議員及地區人士都相熟，自己都傾向做呢方面嘅工作喎。
卓妮