中環出更：單日堅想當年 着白飯魚守龍門
近年冰島足球異軍突起，吸引全球足球愛好者關注。早前香港足球總會（足總）及冰島足球總會宣布一項合作計劃，好多名人去支持。身兼足總董事嘅懲教署前署長單日堅都有到場。講起踢波，單日堅話佢細個讀書時都踢過，位置係守龍門，但當年生活窮困，裝備唔似依家咁齊全，佢當年着對白飯魚布鞋就落場，冇手套戴，就連勞工手套都冇喎。
香港化妝品同業協會永遠榮譽會長郭少明、旅行社東主協會會長葉慶寧、國際會計師公會慈善及教育基金副主席馮家彬同律師陳清霞等人都喺度，事關佢哋有份捐助今次計劃。
梁孔德冀提升本地足球水準
馮家彬話，十個男仔九個都鍾意踢波，佢都好鍾意足球。舊年第一次去冰島玩，見到當地人口只得三十三萬，又長時間被冰雪覆蓋，但係足球發展突飛猛進，即刻搵人搭線安排同當地足總高層會面，喺深入了解之後就更加佩服，所以返港後就努力促成今次兩地合作。
足總主席梁孔德亦都話，冰島足球近年發展好厲害，希望透過計劃提升本地足球水準。
郭少明早前都去咗冰島玩，佢一輪嘴咁勁讚當地街道乾淨、風景好靚、生活步調悠閒、街上又唔多人。不過講講吓，佢就突然窒咗一下話，「如果喺當地做生意就弊喇！」真係搞笑。
廣東社團總會永遠榮譽會長王國強（KK）都有到場，講起早前佢間公司承辦嘅電纜管道挖掘工程發生致命意外，佢個細仔王紹恆首次面對危機處理嘅考驗，唔知KK覺得個仔表現如何呢？KK就讚個仔無論係面對傳媒或撫恤遇難者家屬方面都做得好，公司啲高層主管甚至同佢講，經此一役，個仔作為公司第三代掌門人嘅地位可以確立。睇嚟KK真係可以安心退休喇！
卓妮