成日話香港旅遊來來去去景點都係三幅被，旅客嚟過一次已經覺得厭。其實好多嘢都係事在人為，好似尋日紅館有場盛會，人頭湧湧，除咗吸引本地人，亦有唔少外國客專誠捧場，搞得好，第時分分鐘可以媲美欖球賽同馬拉松賽事o架！
呢嗱，功夫茶講緊嘅咪係一連三日、尋日喺紅館開幕嘅第一屆香港電競音樂節囉。大家都知道紅館係唔少歌手嘅「朝聖地」，除咗因為檔期超緊張，仲因為個場容量夠大，冇番咁上下號召力都唔敢book。好在電競音樂節反應不俗，朝早嗰場都有七成入座率，正如主辦嘅旅發局話齋，年輕人一般作息比較晏，都仲咁神心捧場，認真唔話得。
咁又係吖，觀眾入場唔單止可以欣賞各地最高質素嘅電玩賽事，同場仲可以試穿本地電競品牌展出嘅全球首台VR遊戲電腦背包；鍾意懷舊嘅亦可以用「大牛龜」電視打雅達利遊戲機，打機打到肚仔餓咯喎，又可以行出出面幫襯美食車，祭吓五臟廟，確係幾過癮、幾有氣氛嘅。
咪睇小電競商機，淨係呢類國際賽事已經吸引唔少外國年輕機迷慕名而至，成日話旅遊業要吸引多啲唔同地方嘅高增值旅客，電玩迷為買心頭好，好多時不惜一擲千金，正正係高消費一族，電競音樂節持之以恒，絕對有潛質發展成一年一度嘅盛事。
近幾年所謂「電競經濟學」嘅講法大行其道，當然唔止帶旺旅遊業咁簡單。事實上，由網絡直播到國際賽事再到相關周邊產品，電競已經形成一個龐大產業鏈，「打機等於廢青」嘅套板形象已經out晒。就好似最近畀人DQ嘅前立法會議員羅冠聰咁，原來都係網上直播打機主持，素有「電競聰」嘅花朵，撈番本行走番正路，唔好再搞搞震，話唔定前途一片光明。
言歸正傳，有國際機構之前發表報告，話舊年內地電競市場規模達三百億元人民幣，預計全球市場相關收入好快突破十億美元大關，香港有冇機會從中分一杯羹？聽吓港產電競世界冠軍劉偉健點講，佢建議港府舉辦地區性聯賽，十八區各派隊伍出場，帶旺成個氣氛之餘，亦可以令家長改變觀念，知道原來打機都可以成為職業，有人工收。講真，台灣喺呢方面先行接近十年，連電視都進行直播，香港係時候學吓嘢喇。
當然，遲到總好過冇到，港府今年《財政預算案》提出邀請數碼港研究喺本港推廣電競，旅發局舉辦電競音樂節等，無疑係好嘅開始，怕只怕港產官僚老毛病發作，一味趕時髦，三分鐘熱度，咁就講乜都嘥氣喇！