政情：新丁副局 返工4日即「上位」
暑假期間，人人都想去旅行。政制及內地事務局局長聶德權同發展局局長黃偉綸兩位新丁局長，返新工唔夠一個月，今日（5日）開始就放八日假抖抖。局長嘅重擔就分別落喺資歷更淺，返咗工只有四日嘅副局長陳帥夫同廖振新身上，搞到兩人連自己張櫈都未坐暖，就要頂硬上「坐正」。
兩局長放8日假
另一新丁、商務及經濟發展局副局長陳百里，稍後亦要署任局長一職，代替離港公幹嘅邱騰華。
政府星期二（1日）先公布首批副局長同政治助理名單，陳帥夫同廖振新都係啱啱加入問責班子嘅新丁，做咗四日副局就即刻要署任八日局長，對兩人確實係一大考驗。
新丁副局頂硬上嘅仲有陳百里。由於商經局局長邱騰華明日起離港公幹四日，期間陳百里需署任局長職務。據了解，教育局局長楊潤雄亦打算喺今年中秋節放幾日假，意味屆時同為新丁副局嘅蔡若蓮亦需頂硬上。
另外，財經事務及庫務局局長劉怡翔亦會由明日起放九日暑假，但並非由副局長陳浩濂頂替，而係由民政事務局局長劉江華兼任職務。而財政司司長陳茂波同樣明日起離港公幹四日，職務將由創新及科技局局長楊偉雄署任。