政情：關浩洋請外傭等咗九個月
九龍城區議員關浩洋喺去年十一月升呢做爸爸，佢話BB出世之後真係好忙，所以就經僱傭中心請一名外傭，諗住幫輕吓。點知等咗約九個月家傭先至到港，連中介公司都話唔明白點解。
唔通佢有請家傭方面嘅不良紀錄？關浩洋就話絕對冇，以往同父母一齊住時，屋企嘅外傭都做咗十幾年。咁聽落，佢真係唔好彩嘞！
父親節落區搞到遲大到
講起湊仔經，關浩洋話阿B出世嗰日，佢匆匆抱咗BB一陣就趕返區議會開會，當時議員同官員都忍唔住問佢咁都嚟開會？其實係因為嗰日佢喺區議會大會提出動議，唔可以唔去。結果個會開到夜晚七點，佢又趕返醫院去睇BB。咁匆忙嘅情況唔係單一事件，今年父親節，佢同家人影三代同堂嘅全家福，佢又因為落區做嘢遲大到喎。