政情：蔡若蓮頭炮「幼稚」任務爭分挽支持度
新一屆政府副局長及政治助理陸續埋班，教育局副局長一職最終都喺爭議聲下，由前教育工作者聯會副主席蔡若蓮上任。新政府喺上場前後，都表明會重視教育，唔少人都擔心蔡若蓮一上場就會着手處理同教育有關嘅政治任務，例如硬推國民教育、普通話教授中文科（普教中）等。不過，消息指曾任中學校長嘅蔡若蓮，上場後嘅頭炮任務，竟然係開始着手處理幼稚園教師薪級表事宜，相信連反對派都好難反對。
蔡若蓮曾任中學校長，又喺中、小學教過書，對中小學嘅前線教育工作有番咁上下經驗同認識。但自從傳出佢會出任副局長一職嘅消息後，唔少政黨同學生組織都好擔心，驚蔡若蓮上任後會「染紅」全港嘅中小學，除咗政治任務，仲怕會收窄咗學生喺校園內表達政治意見嘅空間，意味佢搞親中小學，多方面肯定同佢死過。
處理幼師薪級表 小試牛刀
新政府曾表明會重視教育，一上場密鑼緊鼓推出三十六億元教育新資源撥款，最終都趕及喺立法會休會前通過。此外，教育界亦希望政府可制訂幼稚園教師薪級表，改善幼稚園教師薪酬，而新政府就形容議題複雜，需要多花時間作研究同諮詢。但話口未完，政府就急急派出新上場嘅副局長蔡若蓮處理幼稚園教師薪級表事宜。
基本上，幼稚園教師薪級表議題就連屬泛民主派嘅教協都支持，其他反對派都好難反對，加上幼稚園學生咁純真，好似香港眾志秘書長黃之鋒等反對派亦好難喺幼稚園內發動到罷課或抗議行動。況且蔡若蓮同幼稚園界別內都好熟落，事關佢在任教聯會副主席時，曾牽頭成立幼師薪酬關注組，以召集人身份為幼稚園教師爭取合理待遇。莫非咁嘅安排，政府係想蔡若蓮小試牛刀，期望佢喺教育界內洗底兼加分，以挽回支持度？
其實副局長上場着手搞新議題都唔係第一次發生，現時做緊立法會秘書長嘅陳維安，喺○八年上場做教育局副局長時，由於當時同中小學、幼稚園、以及大學嘅議題都已經有其他人處理，再加上佢唔係教育界出身，因此佢被安排嘅頭炮任務係推動屬於新議題嘅「電子書」。