中環出更：梁君彥「發噏風」辣（興）卿姐
立法會前議員劉慧卿（卿姐）主持嘅網台節目尋日邀請咗立法會主席梁君彥（Andrew）做嘉賓，但Andrew竟然喺節目中「辣（興）」卿姐， 話曾任立法會財務委員會主席嘅卿姐「做主席時好惡，唔畀人講就唔畀」。卿姐即時鬧Andrew「發噏風」，澄清自己係等到議員「講到冇人講，冇反對」先停止討論，仲話作為主席要多啲同議員溝通，唔應該到做決定時先臨急叫議員入房傾咁話。
卿姐就話，依家立法會開會情況混亂，財委會審議教育新資源撥款時仲搞到要轉房開會。Andrew就反駁，話卿姐主持財會時，都冇咁多臨時動議、中止待續及休會議案提出嚟，形容係「時代變」。佢仲暗批教育界議員葉建源，話葉建源當時搵建制派反對民主派嘅臨時動議係「又食又拎」，對建制並唔公道。
硬銷短問短答
提到立法會擬增加特首答問大會次數及將大會口頭質詢變成短問短答模式，Andrew就硬銷短問短答好處，話咁樣官員同議員嘅對答會好精彩︰「一刀拮過去，兩劍耍番嚟」，既可以善用時間，又達到監察政府之效，市民亦可以聚焦了解議員提問咁話。講到武俠小說咁，到時立法會咪仲刀光劍影？
卓妮