政情：天文台八號波「添丁」 岑智明話好彩唔大風
短命八號波「洛克」引來市民非議，天文台成為眾矢之的，但風雨過後，天文台亦傳來「喜訊」！天文台台長岑智明喺Facebook報喜，指天文台又「添丁」，原來喺打風當天，有數隻俗稱高髻冠嘅紅耳鵯BB喺尖沙咀天文台出生，岑智明直言：「哩（呢）次真係好彩風唔大！」佢之前Cap圖力證天文台掛八號波冇錯，依家咁講係咪承認八號波風唔大呢？
網民幫紅耳鵯BB改名
喺岑智明上載嘅相片可見，紅耳鵯BB非常精靈有活力，張開嘴巴希望紅耳鵯媽媽餵食。相片引來網民熱議，有人話：「小生命為天文台帶來生氣嗎？」岑智明回覆：「當然啦，感恩。」 有市民形容天文台範圍的確係雀鳥伊甸園，唔少市民笑言要為紅耳鵯BB命名，其中「明明」、「智明與春嬌」成為熱門選擇。