政情：用App睇議員有冇「走堂」 莫乃光促倣效以國
近年立法會拉布成風，議員開會時難免坐唔定或「走堂」，搞到政府要出動由AO（政務官）組成嘅狗仔隊駐守立法會去監視議員出席情況。正出訪以色列嘅香港立法會代表團就發現當地國會議員有冇出席，會顯示喺網站或手機App，同團嘅議員都讚好，仲提議香港倣效添！
可避免AO做狗仔隊
代表團到訪以色列嘅國會大樓Knesset，成員之一嘅資訊科技界議員莫乃光（Charles）發現大樓大堂設有一個屏幕，有齊所有議員嘅照片，彩色顯示嘅代表議員喺大樓內，黑白色就唔喺度。更令Charles讚賞嘅，係有關資訊可透過國會嘅網頁同App睇到，認為可提高透明度。Charles又喺Facebook透露，指有同團嘅建制派議員都覺得電子顯示出席嘅設計好好，認為香港可倣效。Charles亦話早前立法會秘書處想提供議員開會同投票數據，但就因為遭反對先作罷。
現時立法會經常出現拉布同點人數，如果有App睇到議員出席情況，相信各黨派議員都可以更好控制出席時間，政府亦毋須動用AO做狗仔隊睇實班議員。不過，部分議員早前被狗仔隊記錄出入感到不滿，如用App做記錄，唔知有冇議員又會覺得侵犯私隱呢？