政情：走回頭路 鄧家彪「戴兩頂帽」
建制派兩大政團民建聯（民記）同工聯會（工記）近年「分家」，正式劃清界線，工記絕大部分立法會議員及區議員喺二○一二年已退出民記。
旋即惹起地區爭議
但時移勢易又有走回頭迹象，最新一人係舊年九月轉戰新界東直選失敗嘅工記鄧家彪，據報為咗喺未來新界東補選增加資本，甚至喺二○二○年換屆選舉取得零的突破，佢前晚正式加入民記，連同深水埗區議員陳穎欣同黃大仙區議員譚美普，佢成為該會第三名「戴兩頂帽」區議員。
不過，鄧家彪嘅「雙重身份」甫曝光，就引起地區耳語同連鎖反應。仲記得六年前，身為民記創黨成員嘅工聯會元老陳婉嫻喺一一年區選前夕第一個退出民記，翌年工記全部參加立會選舉嘅代表，均被要求退出民記，當時工記嘅講法係政黨同工會角色唔同，民記未必係事事為打工仔，工記就肯定要為打工仔打拚，鄧家彪未來勢必要面對同處理角色衝突嘅問題。