政情：亂噏護漢奸黎 Mark Simon變契弟嘅契弟
外號「漢奸黎」嘅壹傳媒老闆黎智英，早前反口宣布將「出賣」包括台港《壹週刊》等雜誌業務，被員工怒斥佢做「契弟」。漢奸黎嘅左右手、外形同樣「肥嘟嘟」形同其「契弟嘅契弟」Mark Simon，連日來喺多個網媒及報刊撰文護主，力撐漢奸黎出售《壹週刊》等業務嘅決定。期間Mark Simon更用上近日有同名電影上映嘅《鄧寇克大行動（Dunkirk）》、即二戰時英法盟軍面對納粹德軍圍剿時嘅撤退行動嚟比喻出售計劃，非常不倫不類，隨時令受影響員工愈睇愈嬲，甚至影響整單交易。
喻為《鄧寇克大行動》 不倫不類
Mark Simon尋日喺香港《壹週刊》撰文，提到漢奸黎早喺二○○九年已預見到，面對網媒及社交網站挑戰，全球嘅新聞雜誌業務都難以經營，曾當面向某跨國傳媒高層提議對方停辦旗下週刊，而事實上近年多間跨國傳媒都正在重組相關業務，因此今次出售《壹週刊》等業務嘅決定做法合理。
與此同時，Mark Simon又死撐壹傳媒旗下嘅《蘋果日報》紙媒業務仍有生存空間，今次出售計劃對公司股東同餘下員工都有利。佢最後更以《鄧寇克大行動》作比喻，意指今次計劃有利壹傳媒保存實力，以便部署之後嘅反攻。
「賣員工落妓寨」 士氣盡失
Mark Simon將壹傳媒自己經營不善比喻為遭納粹德軍圍剿，本身已經好有問題。尤其Mark Simon做過美國海軍情報員，理應對軍事歷史有一定認識，《鄧寇克大行動》最重要嘅精神，就係寧願放棄領土與軍備武裝，都要救走大批滯留喺法國境內嘅英法盟軍士兵，但壹傳媒近年做法卻剛好相反，包括早前推出「假自僱」外判計劃，變相裁員同剝削員工應有嘅勞工福利。漢奸黎其後決定出售雜誌業務，更被《壹週刊》高層形容為「賣員工落妓寨」，令員工士氣盡失，又何來進行大反攻收復失地？
《壹週刊》員工與新買家早前已就出售計劃隔空罵戰，為交易增添變數，今次「契弟嘅契弟」Mark Simon亂噏護主隨時愈幫愈忙，令漢奸黎「連契弟都做唔成」。