中環出更：梅李玉霞去旅行 家中「龜」女竟生B
卓妮日前喺一個酒會遇到香港會議展覽中心（管理）有限公司董事總經理梅李玉霞（Monica），講開先知原來佢都好鍾意去旅行，尤其睇風景同動物，仲笑言家中嘅黃花「龜」女喺佢去完旅行之後竟然生咗幾隻小龜，真係睇少陣都出事。
Monica醉心欣賞唔同大自然風景及建築物風格，尤其歐洲同澳洲，又指香港生活空間同節奏咁緊迫，去旅行梗係要呼吸吓大自然氣息，感受截然不同嘅風光先似放假o架嘛！佢又透露下一個心儀目的地係去以達爾文進化論聞名嘅「進化島」加拉帕戈斯群島，觀賞史前動物海鬣蜥同巨海龜等。佢仲話屋企都有養龜，唔怪之得對動物咁有興趣啦！
轉頭見到旅遊達人項明生，佢同卓妮分享最新遊歷，原來佢啱啱去完著名品牌第三代Salvatore Ferragamo嘅家中作客。
項明生話有一次搭郵輪時遇上一位優雅女士，原來佢就係著名品牌第三代嘅母親Amanda，傾咗陣偈之後發現大家好多共同朋友，對方更邀請佢到位於佛羅倫斯附近嘅家中及酒莊參觀。項明生話佢哋酒莊及家園嘅牆紙花紋全部由Amanda親自設計，極為精緻，大開眼界。
方舜文外遊都要打書釘
同場仲有「地圖女王」鄧淑明同香港貿易發展局總裁方舜文。出名愛閱讀嘅方舜文連旅行都最愛打書釘，話英國書店同美國書店有明顯分別，美國人睇書總要有杯咖啡，英國人睇書就真係齋睇，佢自己都係讀英國文學出身，所以都好鍾意去英國。除咗睇書，佢仲愛到法國睇藝術品，睇極唔厭咁話。
卓妮