被取消立法會議員資格嘅「長毛」梁國雄，發錢寒之餘，更加鬧人唔使本。他遭地政總署發警告信，要在期限內拆除近百幅橫額，否則會被追回清拆費。一提到追錢，立刻觸動其神經，他斥地政總署「選擇性執法」，在臉書貼文呼籲市民幫忙，又指地政處無恥。阿哥，人哋依法辦事，你就話人哋無恥，但係你嘅所作所為又有幾高尚呢？
孔子說：「勞而不伐，有功而不德，厚之至也！」意思是一個人辛勤付出而不自我誇耀，有功績而不自認為有功，這是敦厚到了極點！然而，「長毛」在議會十多年，除了每年高薪厚酬，給廣大市民印象最深刻的就是愛搞事，有理冇理大呼小叫，抬棺材撒溪錢，拉布衝出位，搶高官文件，無功而不德，沒做過一件正經事，如今被ＤＱ了，還要勞役市民幫你清拆橫額，做人做到咁唔知衰，都算醜中之極品！
老朽話「長毛」發錢寒，真係一啲都冇冤枉o架，日前佢又呼籲港人要改變只在「六四」、「七一」捐款嘅做法，要身體力行和持之以恒喎！佢叫支持者改變生活小習慣，例如出外用膳唔好飲凍嘢，又或者周日唔好飲早茶，佢不厭其煩具體引例：一日三餐出去食飯嘅人，每個凍飲加三元，每日你慳九元，九元乘三十日即係二百七十元，你捐畀社民連，咁已經幫咗我哋好大。星期日朝早食個麵包，幫自己減吓肥。佢又話：喺一個威權主義社會，大家有機會做嘅時候，就好做嘞，將來未必得。唔係講笑，《基本法》二十三條一過咗，可能連我哋啲戶口都要凍結。
「長毛」求財若渴，有如江湖賣藥佬：「我呢啲藥，腎虧者一粒即壯陽，氣弱者半粒可回魂，再唔買又要等十年才可再煉成一百粒，嗱，手快有手慢冇！」梁國雄咁好數口，做咗十多年「尊貴議員」，又住公屋，年薪過百萬，咁多年應該積下唔少身家，咪扮鬼呻窮呃市民錢喇！