政情：梁栢賢放沙士相籲流感要戴口罩
夏季流感高峰期開始，公立醫院病房持續逼爆，當局推出多招希望紓緩問題，但係最有效嘅招數，相信都係市民做好預防措施，有流感就要避免傳染畀人。醫院管理局行政總裁梁栢賢（PY）喺社交網站上載一張戴晒口罩、相信係沙士期間影落嘅舊相，叫大家有流感病徵就要戴口罩嘞！
冀喚起市民防疫意識
PY上載嘅照片，除咗佢本人外，仲有中文大學校長沈祖堯同香港大學醫學院微生物學講座教授袁國勇，相中三人都戴晒口罩，一齊開記者會，相信係沙士期間影落嘅相，相信PY都係希望喚醒大家對沙士嘅記憶，PY仲呼籲大家如果有流感病徵，就要戴口罩。
講真嗰句，沙士可能過去咗十幾年，所以依家港人嘅預防意識都開始差咗，少咗人記得生病要戴口罩以免傳染畀人，PY用沙士嚟提醒大家預防勝於治療，都真係用心良苦呀！