政情：孫鍾小芬育兒良方 勿做虎媽
教育局前局長孫明揚嘅太太鍾小芬，喺嘉諾撒聖方濟各書院任教多年，唔少學生日後都成為出名嘅政務官，至於孫家本身，依家連第三代都有嘞，作為大家長嘅孫太，教小朋友自然有一套方法，原來呢套秘方就係唔好做「虎媽」！
發展潛能時間 各人不同
孫太話自己以前教書都會見到，每個小朋友發展潛能時間各有不同，佢以前有啲學生，細個嘅時候唔係特別叻，到中五、中六先突然發力，亦都有啲學生剛好掉轉，細個嗰陣好叻，但係一到中學就讀唔上，可能係因為讀書方法唔啱，所以讀到中學成績就差咗。
佢仲話自己教書嗰陣啲媽媽「冇咁虎」，當時嘅小朋友發展反而較好，比較生性，覺得依家嘅家長都唔好太緊張，應該畀小朋友自由發展，讀書讀得開心就得o架喇，而自己教第三代都係隨得佢哋自由發展。孫太多年來教出咁多出色學生，睇嚟各位虎媽都要學吓嘢，放鬆啲喇！