政情：戴游梁未醜夠赴日唱衰中港

戴耀廷喺研討會上發言時話，要討論一國兩制嘅情況，就要先了解中國，強調不談一國，就沒有兩制。佢又引述學者提到「中國崩潰論」，話會出現好多唔同嘅情況，但佢都認為可能性低。既然覺得可能性低，點解佢又要引述呢？係咪又想誤導人呢？

戴指香港冇條件搞獨立

老實講，戴耀廷發完一個又一個夢，策動佔領行動搞到社會撕裂，雷動計劃又搞到一鑊粥，風雲計劃更加已經冇人吼，跟住可能喺香港夢碎，竟然踩過界仲話要搞個雷動計劃嘅澳門版，但係都冇人理，依家仲去到日本講乜嘢中國崩潰論，簡直係癡人說夢話，亂噏一通喇！

講到香港未來嘅情況，佢又再舊調重彈，指香港將面對五條路，包括一國兩制、一國壓兩制、一國先於兩制、一國一制以及獨立或自決，但佢認為中國嘅主權冇出現問題時，香港冇條件走向獨立；而中國走向憲政，香港人或會接受，放棄獨立。真係乜都佢講晒喇！

游梁去反華組織研討會

至於梁頌恆、游蕙禎就出席另一場研討會，自稱由青年嘅角度去睇過去幾年香港發生嘅事情，期間引述銅鑼灣書店事件及港大校委會疑被政治干預等，質疑香港冇法治同自由，並且被無形之手干預，一而再唱衰中港。

其實游、梁亦曾去過台灣出席講座播獨，但被取消議員資格後就鮮有現身，游蕙禎早前去七一遊行都閃閃縮縮避開傳媒。點解今次又再高調出嚟？仲記得佢哋舊年喺立法會宣誓時，除咗展示「HONG KONG IS NOT CHINA（香港不是中國）」標語，仲故意將China讀成「支那」，事後被指「支那」係日本侵華時期日本人貶低中國嘅說法，鬧爆佢哋侮辱民族添！唔通佢哋揀去出席日本反華組織嘅研討會唱衰香港，係諗住就算大嗌「支那」都唔會畀人鬧，仲會博到掌聲？