周星馳電影有句經典對白︰「就算係一張廁紙、一條底褲都有佢本身嘅用處。」連廁紙、底褲都值得珍惜，更何況係凝聚作者心血、肩負傳承文化重任嘅書籍，點可以話扔就扔o架！
呢嗱，一年一度嘅書展熱鬧非凡，規模愈來愈大，旺丁又旺財，已經發展成城中盛事，對於鼓勵市民閱讀風氣，本來係美事一宗，可惜書展結束後往往有唔少剩書被棄，淨係舊年就有五十大箱咁多，既浪費作者心血，亦製造大量垃圾，可謂一大敗筆。試諗吓遊客見到呢一幕會點諗，香港「文化沙漠」嘅污名，實水洗都唔清喇。
書展今日結束，會唔會又有大批書籍被棄，好快見分曉。今年主辦方推出保證金新規，多個被揭有份棄書嘅參展商須繳納五千元保證金，再違規就會予以沒收，問題係如果回收書籍成本高過五千蚊，難保唔會有人「棄保」。仲有吖，保證金制度可能傳遞錯誤訊息，只要畀得起錢，就可以亂咁棄書，你吹得我脹咩？
所以話，問題核心始終在於主辦單位同參展商唔尊重文化。貿發局年年總結書展成績，無非係吹噓人數、消費額、參展商增加咗幾多，好少見佢哋講吓每年棄書量，又或者分析銷售書籍嘅類型。部分書店亦係一擔擔，喺佢哋眼中，賣書同賣衫褲鞋襪一樣都係生意經，賤價促銷「大割引」、隨地棄置悉隨尊便，同佢講學術文化，同對牛彈琴冇乜分別。至於貿發局袞袞諸公對此不以為意，甚至表達認同，佢哋胸中有幾點墨水，幾多文化，仲使問咩。
當然喇，書商始終要負最大責任，出版書籍講到尾都係文化事業，賺錢時就「書中自有黃金屋」，蝕錢時就棄如敝屣，唔單止唔尊重文化，更加唔尊重自己！即使在商言商，書商錯估市場反應，只能怪自己眼光失準，最多下次印少啲，胡亂出版胡亂棄置，仲有冇不負責任啲吖！
話時話，貿發局舊年開始同志願團體合作，回收書籍轉贈有需要人士，問題係好似風水命理一類書籍，即使免費派發都未必有人吼，最後仍難逃堆填命運。其實，就算有啲書冇乜轉贈價值，循環再造始終都合乎環保，總好過新簇簇咁丟棄去堆填區，增加堆填區負擔吖。
計功夫茶話齋，要遏止展後棄書亂象，淨係沒收保證金都未夠，最好係約法三章，邊個棄書邊個入黑名單，來年唔畀參展；再唔係由食環署惡吏出手，只要拿出圍捕老弱婦孺嘅一半狠勁，書商每扔一本書罰千五蚊，睇吓仲有冇人敢亂嚟！