政情：劉怡翔焗慣桑拿 唔怕熱廚房
新一屆政府上任逾三星期，唔知班新任局長會唔會抵受唔住「熱廚房」嘅壓力？財經事務及庫務局局長劉怡翔尋日出席書展活動時自爆，平日喜歡焗桑拿，透過高溫令自己「relax少少」。咁工作壓力大唔大？佢坦言覺得「冇乜問題」，可能係佢焗慣高溫桑拿，所以唔怕入「熱廚房」喇！至於教育局局長楊潤雄就話依家壓力較大，唔容許自己犯一啲大錯誤。
劉怡翔話做任何工作均會有壓力，又解釋自己以前擔任副局長、亦曾喺金融管理局工作逾二十年，對有關財經事務的工作較為熟悉，因此認為自己都應付到工作，無太大壓力。除咗焗桑拿，佢亦鍾意以游泳令自己輕鬆吓，又透露鍾意睇極光，亦曾到挪威拍攝，雖對極光嘆為觀止，但由於拍攝時只係聚焦喺天空上嘅極光，欠缺其他景物襯托，所以佢希望日後到加拿大黃刀鎮拍攝極光。
楊潤雄唔畀自己犯大錯
同樣去咗書展嘅楊潤雄就話大學時代嘅氣氛好好，所以想要《多啦A夢》嘅法寶「時光機」，再一次親身感受吓。佢話出嚟社會工作後，發現讀書時代係「好好、好開心」，又話做學生時，學校容許學生犯錯同做得唔完美，直言若自己現時講錯一句話，「可能都會好大件事」，因此壓力較大，甚至唔容許自己犯一啲好大嘅錯誤。