政情：社民連Fb自爆官司宗接宗
以激進泛民自居嘅社民連向來走在抗爭前線，成員更不時被警方拘捕同檢控，有社民連成員前晚喺Facebook（Fb）上載一張相片，列舉被法庭裁定失去議員資格嘅梁國雄（長毛）、主席吳文遠同副主席黃浩銘等人將要面對嘅案件，單係八月共有七宗案要上庭，真係官非纏身喇。
長毛涉收漢奸黎25萬元無申報
社民連成員陳皓恒前晚喺Fb上載一張相片，相中以一塊白板寫滿社民連成員近月提堂同要上庭嘅案件，包括長毛收受壹傳媒黎智英（漢奸黎）二十五萬元捐款冇向立法會申報，被控公職人員行為失當罪；以及吳文遠同埋另一成員周嘉發等人因參與舊年反釋法遊行，而被警方落案起訴「參與非法集結」嘅案件等。
亦有轉載嘅網民笑稱，社民連被控嘅案件常同食物有關，包括之前嘅奶粉案、企圖向政府官員投擲粟米斑腩飯案，及依家吳文遠涉向前特首梁振英投擲三文治案等，譴責社民連浪費食物。