政情：為馮敬恩「獄前教育」楊逸朗：冇乜恐怖嘢
被稱為「佔中輔警」嘅樹仁大學學生會前會長楊逸朗，因為前年喺立法會二讀俗稱「網絡23條」嘅版權修訂條例草案時，向立法會綜合大樓外一個垃圾桶縱火，搞到垃圾桶發生爆炸，早前被判入獄兩年。中大學生會前會長周竪峰日前就專程去石壁監獄探望楊逸朗，佢透露楊逸朗話自己喺獄中冇畀人打，仲話想向可能會被判監嘅港大學生會前會長馮敬恩講：「獄中冇乜太多恐怖嘢，唔使擔心畀人打」，莫非連佢預示馮敬恩要坐監？
周竪峰喺社交網站Facebook上透露，話自己日前去探過楊逸朗，仲話佢依家精神飽滿、身材精練、雙眼炯炯有神、皮膚光滑有彩，連暗瘡同皺紋都唔見晒。
仲話冇畀人打
佢又引述楊逸朗話自己喺獄中冇畀人打，過去一段時間都埋首寫作小說，冇乜時間讀書。
楊逸朗又提醒馮敬恩獄中最難嘅係點樣保持鬥志，同埋唔畀其他監囚同化，一個唔小心就會一齊墮落腐朽，淪為行屍走肉。