政情：姚松炎轉戰新東民主派勢攬炒

據知，民主動力本周中期會就補選安排開會，希望了解各黨就補選嘅睇法，並商討初選嘅安排。但尚未開會，被取消議員資格嘅姚松炎尋日出席電台節目時就率先表示，無論建築、測量、都市規劃及園境界功能界別補選定係地區直選補選都會考慮，又話自己嘅「安全系數」好高，若然參選可以成功過確認書一關，似乎為參與直選鋪定後路。

姚再當選建築界機會微

民主派內部分析，上次立法會選舉建制派兩個人出選建築界，令唯一民主派姚松炎意外當選，預料建制派唔會重蹈覆轍，姚松炎再次當選嘅機會甚微。據知，自決派中有人建議姚轉戰新界東直選，但亦有人話只係初步討論，要等待當事人決定。事實上，姚松炎曾經出選區議會南區置富選區，若然要由功能界別轉去地區直選，亦非天方夜譚。

料長毛會藉着補選交棒

不過，姚松炎要出選新界東補選，首先要「解決」民主派陣營內嘅多個對手，包括上次選舉敗陣嘅范國威、自稱可以團結泛民同本土派嘅張秀賢。至於社民連亦都表明會派人出戰補選，估計長毛會藉此機會交棒。另一個焦點，就係四個被取消資格嘅議員會否作出上訴，而初步只有長毛明言會上訴，小麗同羅冠聰都因為資金問題而卻步。

講到尾，補選就係測試民主派團結嘅大好時機，究竟民主派內部搞唔搞得成初選同埋係咪協調成功，以免出現鷸蚌相爭，等建制派有機可乘，都係要睇民主派自己造化喇！