中環出更：紅背心黃子悅 反蔡若蓮染紅
外間盛傳教育工作者聯會副主席蔡若蓮將會出任教育局副局長，消息早已令泛民陣營大為不滿。尋日更加有政黨同學生組織舉行記者會，反對蔡若蓮染紅香港嘅學生。
之不過，當年反國民教育嘅前學民思潮發言人、現為教育實驗學社傳媒聯絡人身份舉辦呢次記者會嘅黃子悅，竟然着住件紅色小背心嚟反對人哋染紅，莫非佢想話自己已經率先被染紅？
幾個學生組織尋日一齊舉行「反對任命教聯會蔡若蓮」記者會，表達佢哋憂慮蔡若蓮做咗副局長之後，會展開推動普教中嘅政治任務、收緊學生喺校園內表達政治意見嘅空間。
黃子悅發言嘅時候更加鬧爆蔡若蓮，話佢過往曾經推動普教中同赤化教育，憂慮佢真係做副局長嘅話，會禁絕校內嘅政治聲音，染紅莘莘學子喎。佢哋仲話，之後會擺設街站宣傳反對蔡若蓮嘅原因，又會到教聯會要求同蔡若蓮對話，唔知到時佢哋又會唔會着紅色衫呢？
卓妮