中環出更：同畫家「對話」蕭暉榮靠睇作品
盛夏下嘅香港熱到暈，但早幾日就有一陣「西北風」吹到嚟。早前一個名為《守望高原——艾生水墨家園》嘅開幕典禮，展出以畫西北黃土高原聞名嘅內地知名畫家艾生嘅作品，好多愛畫之人都去捧場，包括香港美術家協會主席蕭暉榮等人。書法、繪畫同雕塑都好叻嘅蕭暉榮一嚟到，未同畫家打招呼就一支箭咁行入場內專心睇畫，佢笑笑口話藝術家係靠作品對話，所以睇畫緊要啲喎。
榮寶齋（香港）有限公司總經理周伯林形容黃土高原冇樹冇水，同中國傳統水墨畫相比，一啲都唔易畫，希望透過今次展覽，為香港帶來清涼嘅「西北風」之餘，亦可令中港藝術家互相交流。
高燕着衫要五顏六色
香港內蒙古社團總會秘書長高燕都喺度，佢一睇到畫中嘅高原、窰洞同埋黃河就入晒神，事關內蒙西部與陝北接壤，兩地只係一山之隔，佢見到呢啲荒涼景色不免勾起兒時記憶。佢稱小時候生活困苦，冇肉食，衫就只得黑藍灰，所以佢移居香港之後，食嘢無肉不歡，衫就鍾意着到五顏六色，見到淨色衫即耍手擰頭喎，真係搞笑。
新青會副會長吳聖傑同太太宓琪其（Kiki）都帶一對仔女去欣賞。暑假流流長，唔少大學生都會做暑期工吸取吓工作經驗，Kiki就安排即將升讀大學四年級嘅兒子吳淵到日本及韓國實習，希望個仔除咗學到點做嘢，仲可以喺日本人嘅身上學到做事、做人認真嘅精神。
卓妮