拓土地自我吹噓 曾爵士恬不知恥

正所謂不在其位，不謀其政，環顧中外，一個領導人退咗落嚟好少說三道四，指點江山，唯獨曾爵士不甘寂寞，之前轉行做報紙寫稿佬都嫌未夠過癮，家陣仲要趷個頭出嚟接受電視台專訪，真係頂佢唔順。曾爵士喺訪問中強調，自己任內冇一分鐘停止過開發土地，從發展土地到建好房屋至少要十一、二年時間，現時建成嘅房屋，都係拜佢同老董任內開發土地所賜喎。

真係唔講猶自可，一講把幾火。係人都知，曾爵士在任七年根本無做好房屋政策，特別係停建居屋、減少土地供應、將賣地變成勾地，今時今日香港房屋階梯出現斷層，大批基層市民私樓買唔起，公屋冇資格又或者輪唔到，愈來愈多人焗住住劏房，講嚟講去都係佢老哥種的禍。有立法會議員形容曾爵士推卸責任係「可恥」，真係一針見血。

其實曾爵士自己都識講，起樓唔係一朝一夕可以成事，但事實係佢任內一直無所作為，洪水橋、東涌等大型住宅發展項目毫無寸進，直到上屆政府至進行諮詢，以港府議而不決、決而不行嘅作風，無殼蝸牛真正上到樓，都唔知要等到幾時。

家陣最大鑊嘅係，香港社會愈來愈政治化，政客為反而反，發展阻力只會愈來愈大。財政司司長陳茂波尋日就呻到樹葉都落，話今年立法會財委會最後一次會議，淨係過到三十六億港元教育撥款同埋三間醫院工程撥款，至於東涌新市鎮擴展撥款，最快都要拖到十二月至有望通過，擔心未來多項工程一齊招標，唔單止會令造價愈來愈高，亦會對建造業造成不良影響。波叔話要簡化立法會撥款程序，講就講得輕鬆，做唔做到仲要睇過至知。點講都好，如果唔係曾爵士當年貽誤先機，依家就唔使後來者硬食喇。

冇錯，正如曾爵士自己喺專訪中解畫，佢上任之初香港經濟仲未從金融風暴中復甦，減少房屋供應無可厚非，但幾年後經濟暢旺，樓價係咁飆升，曾爵士仍然無視昭昭民意，死都唔肯改弦更張，就點都講唔過去。所以話，曾爵士成日畀人質疑「托市」，向大地產商傾斜，都係自己攞嚟嘅咋。

始終都係嗰句，前人種樹，後人乘涼；前人種禍，後人遭殃。曾爵士開口埋口「相信香港人」，香港人畀你老哥搞到雞毛鴨血，信你一成，雙目失明就真！