早前有民調顯示，新一屆政府十三名問責局長當中，暫以民主派出身嘅勞工及福利局局長羅致光民望最高。羅致光尋日接受電台訪問時表示，自己上任只有三個星期，民望高明顯係靠「食老本」，反映市民認同佢當年做立法會議員時嘅工作，但依家民望高反而令佢緊張，擔心唔能夠維持表現而下跌。咁又係嘅，羅致光一上任就要處理取消強積金對沖同標準工時等燙手議題，對勞方資方注定兩面不討好，民望下滑係遲早嘅事，係爭在跌得有幾快啫！
