政情：張國鈞遊日 囡囡話晒事
每年嘅七月份，除咗小朋友有得放暑假，就連立法會都休會，所以唔少議員都可以趁機抖吓充充電。早前喺球場上撞見立法會議員張國鈞（Horace），唔使開會嘅佢難得有時間踢吓波，佢仲話已安排同囡囡去旅行，把握機會享受家庭樂。
Horace係三料議員，唔使開立法會都仲要出席行政會議，所以要等八月行會放假先有機會同屋企人去旅行。佢仲話，早排問囡囡暑假想去邊度玩時，五歲嘅囡囡竟然識答去福岡喎，佢就估係囡囡聽完同學仔講後有樣學樣囉！
負責做司機 預咗冇得玩
囡囡主張遊日，Horace相信同佢哋去過沖繩玩有關。事關當時囡囡已經大讚日本好好玩，因為有得瘋狂扭蛋，又可以狂食雪糕同薯片。細路仔玩得盡興，但就難為咗佢哋兩公婆，因為一個做司機，一個做保母，成個旅程冇得玩囉！不過Horace都話冇所謂，因為囡囡大咗就唔肯黐佢去旅行喇！