政情：包青天唔易做 劉燕卿嘆壓力大
社會怨氣愈來愈多，被視為現代「包青天」嘅申訴專員公署接獲巿民對政府部門嘅投訴都唔少。申訴專員劉燕卿（Connie）話，有時完成調查之後，投訴人唔滿意結果，會轉為投訴調查人員，令接聽投訴熱線嘅前線同事壓力大增。睇嚟要做包青天都唔係咁容易。
有職權限制
為咗減輕前線同事嘅壓力，Connie話會定期調配唔同嘅同事去接聽投訴電話，將壓力分散出去。佢又話，公署仲有另一種難處，就係唔係全部投訴都可處理，因為唔屬於佢哋嘅職權範圍。例如針對人事安排或司法程序，佢哋就無權處理。
至於有啲太過瑣碎，或者過往曾經調查性質相近嘅投訴，而結論顯示並無行政失當嘅，專員就只會酌情決定是否立案向部門展開調查。