政情：歷劫羅君兒戒掉大小姐脾氣
堡獅龍創辦人羅定邦孫女羅君兒，一五年在西貢住所被綁架，遭禁錮山洞四日，最後家人交付二千八百萬港元贖金終獲釋，事件引起全城轟動。事隔兩年幾，羅君兒親撰新書分享心路歷程，自言未有被綁架經歷影響人生，反覺悟面對困難時要相信自己，不輕言放棄，亦唔受事件嚇怕而請貼身保鏢。
明白「唔係人人都會幫自己」
羅君兒尋日出席新書活動時稱，遭綁架期間好徬徨，只能從以往睇過嘅電影或雜誌，推斷之後可能發生咩事。佢喺過程中學識保持自信、永不放棄，最終先能克服困難。喺富裕家庭長大嘅羅君兒承認，以往有「所有人都應對我好」嘅大小姐脾性，早年喺法國巴黎工作，曾經因等候夜班同事返公司，深感委屈即辭去工作。佢話綁架經歷令佢明白，想達成目標要靠自己爭取，唔係人人都會幫佢。
羅君兒坦言遭綁架後冇請貼身保鏢，因為唔想因此影響生活。又話事件令佢了解到父母對佢嘅疼愛，父親羅家駒仲鼓勵佢勿受事件影響，應「做回自己」，令佢甚為感動。