政情：破產邊緣踢多腳 地政限時拆橫額 DQ四人組拆唔掂
福無重至，禍不單行！社民連梁國雄（長毛）、自決派劉小麗、香港眾志羅冠聰與建築界姚松炎被取消議員資格（DQ）後，除咗要支付巨額訟費，以及面臨被立法會追收數以百萬元計嘅議員薪津外，原來仲有其他之前諗唔到嘅額外開支。地政處近日向「DQ四人組」發信，要求佢哋喺短短幾日之內，極速拆晒之前以議員身份喺全港路邊懸掛嘅所有宣傳橫額，否則就會向佢哋徵收相關費用同罰款。其中長毛已率先「舉白旗」投降，表明冇可能喺限期內自行拆晒所有橫額，呼籲支持者幫手拆嘢。如果有關呼籲反應欠佳，隨時會令長毛等人加速破產！
未完全拆卸將被追罰款
長毛前晚（21日）喺社交網站Facebook發文，自爆喺被DQ後，收到來自北區、大埔同沙田等分區地政處嘅信件，大意係指佢已被取消議員資格，冇權再佔用只供立法會議員借用嘅路邊橫額位，要求佢喺聽日（周一）之前將所有橫額拆除，否則相關部門會代為清拆，然後再向佢收番所需費用及罰款。
長毛自言，佢所屬新界東選區幅員甚廣，一定冇可能喺限期之前完成清拆工作，故公開呼籲支持者免費幫佢手拆嘢，以及順手將拆咗落嚟嘅橫額送返社民連總部，等佢將來可以循環再用。佢仲喺Facebook上載埋自己喺各區嘅橫額位置，以便支持者對住嚟拆。
其實過往亦有唔少議員同候選人，因為非法或逾期清拆路邊宣傳橫額，而遭到相關部門徵費罰款，每幅橫額收費由百多元至數百元不等。小數怕長計，假設長毛有一百條橫額未能及時拆除，就隨時會被罰款數萬元。最重要係佢依家已經失業斷糧，唔係咁易可以找清條數。
來自九龍西嘅劉小麗同香港島嘅羅冠聰，由於選區較細，估計需要清拆嘅橫額數目會少過長毛。至於來自功能界別嘅姚松炎，路邊橫額數目相信會更少，但過往佢有部分橫額係與其他專業議政議員共用，一幅橫額同時有幾個名同肖像，都唔知點計數。姚松炎接受我哋嘅查詢時就話，佢已經好高效率咁，將包括自己單頭同與其他議員共用嘅所有橫額拆晒，毋須擔心畀地政處追數。