中環出更：鄭松泰聘鄭錦滿 隨時齊齊冇得撈
立法會議員都偏好聘用自己黨友做助理，唔止建制同泛民係咁，熱血公民立法會議員鄭松泰都唔例外。根據鄭松泰所提交嘅議員申領開支表顯示，由去年十月份開始，佢請咗人稱「四眼哥哥」嘅該黨副主席鄭錦滿做地區辦事處主任，月薪有一萬五千蚊。
四眼哥哥服刑期間冇糧出
四眼哥哥今年三月底因佔領運動期間違反禁制令，阻撓旺角清場而被法庭判監，五月底先至出獄，所以呢段期間都冇糧出。不過話時話，鄭松泰面臨褫奪議員資格嘅官司，如果最終被取消資格，大家就齊齊冇得撈嘞！
另外，亦有議員喜歡聘請現任或前任區議員做助理。前年連任失敗嘅民建聯前北區區議員賴心，依家就獲佢嘅黨友立法會議員劉國勳聘用做助理，不過月薪比做區議員時低，只有二萬四千蚊。但比起獲批發及零售界立法會議員邵家輝聘為助理嘅東區區議員李鎮強，賴心嘅人工都算唔錯，因為李鎮強嘅月薪只係一萬蚊。
卓妮