中環出更：電子產品橫行 小朋友欠創新 鄭文聰：好不幸
電子產品愈出愈多，就連小朋友都個個拎住手機、平板電腦玩不停。香港工業總會主席鄭文聰日前出席亞太文化創意產業總會（總會）一個活動時，就大數以前自製嘅玩具，包括用雪條棍整槍、用荷蘭水蓋做飛鏢，又用報紙摺大紙船喺屋企拖行，扮大王出巡等。佢話以前屋企冇錢買玩具，乜都靠自己整，靠自己發揮創意，依家啲小朋友屋企太多嘢畀佢哋，搞到冇晒創意，好「不幸」咁話。
講起依家小朋友好多時都會被父母塞啲手機、平板電腦等「電子奶嘴」喺手，鄭文聰就話家長為小朋友揀玩具時，應該選擇一啲可以畀佢哋發揮創意嘅玩具，例如可以每次都砌到唔同嘢嘅積木，等佢哋動吓腦筋。佢又覺得以前啲人要玩就要自己諗，所以培養到深層創意，嫌依家啲後生仔嘅創意太表面喎。
本身做玩具生意嘅總會創會會長蔡漢成就話，自己細個時屋企買唔起玩具，只能望住人玩，想玩就要發揮創意DIY。
蔡漢成試過月花3萬買玩具
後來投身工作之後，試過每個月花二、三萬元去買玩具，多到要租倉存放添。不過依家就買少咗好多喇，因為怕太太「詐型」。今次佢哋就喺活動中發揮創意，以唔同色嘅膠箱砌出總會個名。
工總副主席嚴志明就話，以前啲小朋友會同隔籬鄰舍嘅小朋友諗吓有乜嘢玩，比較講求合作同創意。依家嘅小朋友就少咗會問「為甚麼」。作為設計師嘅佢就認為，一定要成日問「為甚麼」同「點解」，先至會有好嘅設計意念咁話。
卓妮