港產官僚出名係四方木，唔踢唔郁，好似香港郵政喺中環嘅總局咁，霸住市區靚地大大話話幾十年，長期暴殄天物，好在有本報發揮第四權功能，接連踢爆，港府至死死地氣肯搵地方搬咋。
尋日立法會經濟發展事務委員會開會，港府透露將花十七億元將中環郵政總局大樓改為辦公室及零售用途為主嘅商業發展，並且喺九龍灣撥地重置總部，至於現有服務會由其他分局提供。
有立法會議員就講得啱嘞，審計署曾經先後兩次發表報告炮轟香港郵政歎慢板，令中環總局搬遷計劃停滯不前。講開郵政總局搬竇嘅歷史，真係一匹布咁長。港府早喺一九八六年已經計劃將中環總局搬走，點知淨係搵地方已經搵咗廿幾年，喺一○年決定撥出九龍灣一幅地皮，將中環總局以及紅磡灣國際郵件中心合併重置，好嘞，等到九龍灣郵件中心三年前落成啟用，以為萬事俱備只欠東風喇，點知香港郵政仲係賴得就賴，一時話未有具體時間表，一時話要照顧當區居民需要，以致畀人揶揄為「最牛釘子戶」，如果唔係本報鍥而不捨跟進報道，唔知仲要拖到幾時。
係人都知，今時今日寄信嘅人愈嚟愈少，香港郵政冇理由繼續生人霸靚地，更何況中環海濱係市區買少見少嘅商廈靚地，拎出嚟拍賣，庫房閒閒哋收番幾百億。至於當區居民需要，家陣港產官僚自己鬼拍後尾枕，原來其他分局做埋就得，即係話成個總部大而無當，早搬早着！
講開生人霸靚地，除咗香港郵政總部，好多港府部門都係設於市區心臟地帶，好似位於灣仔海旁嘅入境事務大樓等三幢政府辦公大樓，港府早喺○八年已經計劃搬遷，結果又係議而不決，決而不行，就算一切順利，最快都要到六年後至搞得掂，真係蚊都瞓蛇都死。
大家有眼見，大城市將政府服務轉移至郊區係大勢所趨，北京市政府搬去通州就係最佳例子。好多學者建議港府部門轉移到新界，一來促進新界區就業，二來減少來往市區同郊區交通壓力，值得港府好好考慮。再講吖，港府成日呻「地從何來」，實情係大量官地長期養蚊，只要善用呢啲寶貴資源增加房屋供應，無殼蝸牛就唔使咁慘喇！
當然，香港郵政浪費靚地固然係大問題，浪費公帑先至罪無可恕。呢個衙門醜聞多多，內部管理亂象叢生，「失信於民」多過食飯，服務縮水之餘OT補水支出卻逐年增加，納稅人慘淪提款機。反正私營速遞公司表現贏出九條街，與其嘥米飯養廢柴，不如認真考慮香港郵政嘅存在價值好過。