立法會財委會休會前最後一次會議，泛民主派議員一如既往「拉布」阻止議程審議；有待通過的多項撥款議程，全屬民生項目，其中備受關注的三十六億元教育新資源撥款，最終在混亂中通過。泛民無奈釋出「善意」，明顯係知道教育界得罪不得，皆因教育界乃泛民票倉。
依家泛民共有六位議員被取消資格，說不定被ＤＱ的泛民議員會陸續有來，連環災劫，難怪佢哋心情沉重，如喪考妣。之不過，泛民係乜嘢貨色就係人都見到，佢哋喺教育撥款通過之後，立刻露出無賴真本色，朱凱廸、陳志全、毛孟靜等拉起橫額，衝出主席台前高呼「人大釋法可恥，ＤＱ議員可恥」，狂呼大叫令會議一度暫停，咁搞法，餘下的多項民生議案梗係通唔過喇，除了公務員加薪撥款，其餘的東涌新市鎮擴展撥款、興建沙嶺骨灰龕場撥款、中九龍幹線撥款、油麻地露宿者服務單位重置工程撥款等，全部涉及基建工程，難怪建造業大聯盟炮轟泛民拉布拖延工程進度，嚴重影響全港約四十萬名建造業從業員。
泛民把民生項目同政治掛鈎，又大細超，無視建築工人嘅飯碗，講到尾就係與民為敵，作法自斃。對未能表決中九龍幹線撥款感到失望嘅運輸及房屋局局長陳帆說：「我相信以普通人的智慧都可以判斷責任誰屬。」畫公仔都畫到出腸啦，民主派會議召集人涂謹申卻一味推卸責任，表示部分撥款未能通過，是梁振英政府以釋法方式取消議員資格、導致議會不穩定狀態造成，責任在於政府。如此潑皮，難纏過小鬼！
有個故事說，一個腳上長瘡嘅人痛不可忍，叫家人為佢鑿壁，佢唔係想偷光，而係覺得將隻有瘡毒嘅腳伸向鄰家尺許，腳痛就唔關佢事。如此自欺欺人，其歪理無知如涂謹申之流所說，都是梁振英的錯，如此狡辯，四十萬建築工人會信嗎？