本年度立法會會期已經進入尾聲，立法會為咗答謝秘書處過去一年嘅努力，原本已定好咗日子同秘書處職員舉行茶敍。不過，喺茶敍舉行前一日突然取消咗，據聞係同四議員被取消議員資格嘅DQ案官司有關。
話說茶敍原本定喺上周五（14日）進行，正正就係DQ案官司宣判當日，但係舉行前一日大家先知高等法院將會就宣誓風波進行宣判，一旦有判決，秘書處就會有大量文件同工作需要處理，所以就臨時決定將茶敍取消。
結果大家都睇到，DQ案確實令議會氣氛勁緊張，所以有議員認為取消都係明智嘅決定。
但係立法會議員早已為今次聯歡活動準備好食物，亦都夾份訂咗大量嘢食，包括兩隻燒豬，聽聞食物就照舊送到立法會，供秘書處職員當日邊食邊工作，好彩冇浪費。不過相信呢班秘書處人員都忙到食不知味喇！