政情：何啟明挑戰15層升降機塔收集數據為講數

身兼觀塘區議員嘅立法會議員何啟明，擔心升降機塔嘅兩部升降機如果一齊壞，班街坊就唔知點算，所以尋日佢親身試跑十五層樓梯，話要收集數據方便同政府傾喎。

一度撐欄回氣

大熱天時走去跑樓梯，唔講都知好辛苦喇！見何啟明喺Facebook上載嘅片段，佢聲言要挑戰呢幢「世界級升降機塔」。咪睇佢正值壯年，又身穿運動服裝，好似做足準備，但其實係有姿勢但唔太夠實際，因為佢跑得好吃力，中段時已經頂唔順，一度撐住欄杆回氣。

用咗4分45秒

最後佢用咗四分四十五秒跑畢十五層，到達頂層時仲喘晒氣，更要成個人坐埋喺地下回氣添。抖順條氣後，佢就搭升降機落番地下，直言已經跑到腳軟。睇嚟如果真係咁唔好彩同時壞兩部升降機，對居民嚟講都幾大件事。