政情：DQ「頭七」留戀立會 長毛三度回魂

去埋「咪兜」發言做訪問

長毛上周五（14日）被裁定喪失立法會議員資格，但喺今個星期一、二（17、18日）就分別以關注綜援低收入聯盟代表及社民連成員身份，出席立法會兩個與勞福議題有關的公聽會。到咗尋日朝早，長毛就第三次變身，出席經濟發展事務委員會會議，代表缺席會議嘅大嶼山機場航道關注組代表郭永健發言。開完會之後，長毛仲好似以前做議員咁，行埋去二樓會議室外嘅「咪兜」發言。由於佢嘅發言內容同公聽會相關，所以冇被現場嘅保安員趕走。

適逢本年度立法會即將完結，會議亦將近完結，長毛咪連變身出席立法會會議嘅機會都冇埋？非也，事關由現在至下星期尾撤離限期內，佢仲可以用立法會證件進出立法會及辦公室所屬樓層。長毛亦趁住呢段執嘢期間，影咗唔少自己辦公室嘅環境片段放上網作最後緬懷添。

搶文件案 下月將審前覆核

此外，長毛冇得做議員後，仍有幾單官司纏身，包括涉嫌收取壹傳媒黎智英二十五萬港元捐款後，因無向立法會申報而被控一項公職人員行為失當罪，該案件將於本月底有裁決；而在去年十一月中，長毛在立法會一委員會會議期間，涉未經時任發展局副局長馬紹祥同意下搶走關於橫洲發展的機密文件，因而被控一項《立法會（權力及特權）條例》的藐視罪，該案件亦將於下月七日進行審前覆核。

在有關搶文件一案中，律政司代表去信立法會申請特別許可，要求議員麥美娟等十一人提供證據。如此看來，接連官司將令長毛未來一段時間仍會「陰魂不散」。