中環出更：郭偉強慳儉「上車」做業主
香港樓價高，「上車」難，就連立法會議員要「上車」都唔係易事。勞工界立法會議員郭偉強婚後至囝囝出世，都係同父母住，一家五口住三百平方呎樓都算擠迫戶。不過郭偉強最近成功入市，終於以大約六百萬元購入北角一個約四百平方呎嘅單位，遲啲裝修完一家三口就會搬入新居。
呻畀完首期「元氣大傷」
雖然升呢做業主，不過郭偉強似乎唔係太雀躍，反而好頭痕，因為屋企得四百平方呎，「擺唔落工人」，如果郭媽媽幫唔到手湊BB，佢太太就可能要全職照顧囝囝咁話。佢仲大呻樓價好貴，佢畀完四成首期後就「清倉」，形容「元氣大傷」喎。為咗慳番啲錢，佢已搵定啲親戚朋友幫手介紹裝修公司，希望可以經濟實惠啲咁話。
至於點解選擇喺北角「落腳」，郭偉強話係因為新居附近多學校，樓下幼稚園都有四、五間，可以方便囝囝將來讀書。相反舊居樓下就只有一間幼稚園，冇乜選擇喎。
卓妮