中環出更：何善彰寫偵探小說爸爸力撐
好多城中名人趁書展期間出新書，通訊事務管理局前主席何沛謙嘅廿四歲兒子何善彰（Adrian），尋日亦為佢嘅第九本英文偵探小說舉行新書簽名會。身形削瘦嘅Adrian去年大學畢業之後，去咗小學教寫作班，希望推廣英文寫作，明年仲會修讀中大英國文學碩士課程。到場支持嘅何沛謙唔願上鏡，但就話會鼎力支持個仔喺文學路上發展。
呢本小說係Adrian同大學同學Natalie合著，同場仲有好多小朋友，佢哋係Adrian嘅寫作班學生。Adrian話佢特登邀請佢哋擔任小說嘅「小模特兒」，以激起佢哋對英文寫作嘅興趣喎。
聶德權鍾意睇推理小說
偵探及推理小說夠晒吸引，政制及內地事務局局長聶德權都係擁躉之一。佢自言好鍾意睇推理小說，啱啱結婚時，試過趁太太外出，自己喺屋企由朝睇到晚，結果太太吩咐佢做嘅嘢一件都冇做過。
雖然咁沉醉，不過佢笑言睇推理小說會令人變得「殘酷」，唔係咁好喎。
商務及經濟發展局局長邱騰華都有出席書展活動，佢呻話「買書容易讀書難」，因為工作忙碌，所以佢習慣讀咗頭一兩個章節即放低，再去睇其他書。講開又講，佢同聶德權尋日咁啱都買咗關於「一帶一路」嘅書，唔通高官買書都要講「政治正確」？
旅遊達人項明生係書展常客，佢為咗宣傳本同佛教有關嘅書，就首次開金口獻唱心經。
雖然佢唱到高音位時都幾令人「震驚」，但係現場粉絲就聽得好陶醉。
卓妮