「篤篤篤撐，篤篤篤撐……」各位觀眾，有請契半弟出場。「男兒賣國家，驚住條屍冇碇掛，寧願做契弟，留低班豬仔，收錢過法蘭西歎埋下半世……」呢首調寄《賽龍奪錦》嘅《男兒賣國家》，除咗由契弟都做到半天吊嘅漢奸黎演繹，簡直不作他人選。
呢嗱，漢奸黎前後五次誓神劈願，話出售壹淫媒旗下刊物就係「契弟」，其中二○一三年六月接受商台節目訪問，被問到相關傳聞，佢當時大大聲直斥「亂噏」、「賣咗一世變契弟」、「有錢都做契弟，你估我傻嘅咩」，點知幾年過去，免費報「爽死了」，台灣業務焦頭爛額，連「假自僱，真裁員」屎橋都出埋不特止，家陣仲計劃以五億元出賣《壹週刊》等刊物喺香港及台灣嘅業務權益，係剩低爛果報未賣嘅啫。漢奸黎契弟做咗一半，是為「契半弟」也。
枉漢奸黎仲好意思扮晒民主鬥士，口口聲聲「有責任撐香港民主」，家陣連自己公司同班伙記都撐唔起，簡直笑大人個口。可憐壹淫媒班員工，多年來仆心仆命幫漢奸黎反中亂港，助紂為虐，搵埋咁多違心錢，簡直係人生污點，依家漢奸黎一個屈尾十拍拍籮柚，要錢唔要人，自己就隨時挾洋主子狗餅「過法蘭西歎埋下半世」，同賣豬仔完全冇分別，抵佢畀員工兜口兜面鬧契弟兼問候老母。
不過大家可以放心，漢奸黎做「契全弟」，只係遲早問題。正如古時候太監淨身入宮，間唔時都有一、兩個因為割得唔夠徹底，仲有些少外露嘅部分，呢個時候就要進行「翻閹」，成為徹頭徹尾嘅公公。而呢第二刀有個專門名詞曰「刷茬」，一個唔小心割深咗，後患無窮，痛苦程度絕對不下捱第一刀。壹淫媒近年業績不斷惡化，由二○一一年至今七個財政年度，累積虧蝕近十五億元，再咁落去，唯一吊吊揈嘅爛果報都要割埋，實行幫漢奸黎嚟一次「刷茬」，到時佢老哥想唔認「契全弟」都唔得！
當然喇，世上總有逐臭之夫，做契弟嘅樂趣，真係不足為外人道。想當日漢奸黎仲係風光之時，又做反對派金主，又向年輕人播獨，稱王稱霸，不可一世，家陣衰咗亦可以擸錢走人，「漢奸賣國有錢途，反中亂港有運行」，就係咁解。
成功贏面子，失敗贏裏子，契半弟嘅算盤不可謂不響。之不過跑得了和尚，跑不了廟。漢奸黎官司纏身，除咗黑金醜聞之外，幕後策劃佔中亦唔知幾時輪到自己落鑊，如果以為「金蟬脫殼」就可以甩身，唔使踎監洗廁所，未免太傻太天真。
多行不義必自斃，大戲裏面嘅奸角唔係狗頭鍘伺候就係發配邊疆充軍，斷估契半弟下場都唔好得幾多，到時最應景就梗係整番首「篤篤篤撐，篤篤篤撐……齊歡唱，同慶賀」嘞！