民主派四名立法會議員全遭法庭取消資格，一眾泛民如喪考妣，唔肯相信係事實，應了老朽所說的，反中亂港者不願夢醒，因為一旦夢醒知道前途黯淡，肯定更沮喪。不過，佢哋仲有一招叫「一味靠嚇」，不是嗎？民主派把憤怒發洩在林鄭身上，話訴訟雖然唔係佢提出，不過民主派同佢是否有偈傾，要視乎林鄭政府會唔會行使抗辯權力，以及是否講明不再入稟ＤＱ其他民主派議員，家陣知驚就講呢啲！
民主派知驚卻仍要嘴硬，說甚麼「依家睇緊林鄭係咪真係有心做嘢，拆除梁振英埋落針對民主派嘅炸彈」，阿哥，乜叫「有心做嘢」？民主派叫囂ＤＱ四位議員係人大釋法「篡改」選舉結果；而事實係佢哋自己玩死自己，法官判得再明白不過，一切按《基本法》條文和人大釋法嘅內容，以及本地法律判案，沒有任何政治考慮，也看不到政府施加任何不當影響。
林鄭月娥早前接受外媒訪問，對四名立法會議員被取消資格一事，佢話要建立橋樑要依法進行，並強調「無論行政長官抑或政府官員，都不應該因為要建立友好關係，而要在法治上作出妥協」。嗱！咁就啱啦！依法辦事絕對不能和稀泥，反中亂港的罪魁禍首一日未落鑊，法治的公平正義就是「你呃人」！老朽確實想見到新政府依法辦事嘅新風格！
法治上確不可妥協，因為泛民以為一味靠嚇就可運轉乾坤，政府此刻不必亂伸橄欖枝，否則便墮入「父子騎驢」困境。寓言說兩父子牽驢往市集，旁人笑其有驢不騎正蠢才，於是個仔騎上驢背，旁人指指點點話佢不孝；於是佢讓父親騎，不料旁人又斥其父虐兒。最終父子倆抬着驢子去市集。結局是父子二人累得半死而驢子也因掙脫掉入河中溺斃。新政府若沒主見，「為修補而修補」不顧原則，老朽恐其最終墮入「父子騎驢」之困境。