政情：八網難逃：鄧家彪拉花拉出內臟
要學好一門手藝真係唔容易o架，勞工顧問委員會勞方委員鄧家彪（Bill）都走去學吓手藝，試吓咖啡拉花，不過阿Bill就自爆學咗兩個鐘頭，都拉唔出個心形，只係拉到好似內臟咁嘅花紋，似足小朋友做功課，用擦膠愈擦愈污糟咁，睇番部分連鎖快餐店賣嘅咖啡都已經拉得出多個心心，阿Bill感嘆，其實呢門手藝真係好難得o架！
阿Bill講起，自己以前係立法會議員時，一日飲四杯咖啡，加糖唔加奶，就算傍晚飲都唔怕夜晚瞓唔着，因為日間不斷睇文件，夜晚實在太攰啦！佢話當時都怕飲到失去提神嘅作用，有時都唔畀自己飲咖啡幾日，改為飲茶，至於依家唔再係立法會議員，飲咖啡都冇飲得咁多嘞！
點解學拉花？佢話今次趁住文憑試放榜，特登去了解呢位叫阿健嘅咖啡師，阿健好早已經決定唔再進修，而去學一門手藝，喺咖啡世界打滾，了解咖啡嘅知識。聽落，真係行行出狀元呀！