政情：調整投票時間建制泛民冇共識
立法會一個事務委員會尋日討論政府就選舉日投票時間提出嘅三個方案，唔少建制派議員都提出應該縮減投票時間，認為香港投票時間超過十幾個鐘頭太長，但有泛民議員就唔支持縮減時間，睇嚟要有共識都唔容易。
麥美娟倡減四個鐘
工聯會嘅麥美娟認為要縮減投票時間，因為甚少國家同地區投票時間會好似香港咁，投票投成十幾個鐘，好似美國朝七晚九、台灣朝八晚四、韓國朝六晚八咋！不過，佢明白遷就港人生活同工作時間，建議可以朝七晚六或朝七晚八。嘩！
現時嘅投票時間朝七點半晚十點半，總共十五個鐘，麥美娟建議減三至四個鐘，都好大刀闊斧喎。
另一建制派議員張國鈞直指選舉期間，不論喺候選人同助選團隊都同樣辛苦，因為投完票仲要等點票，分分鐘成三十幾個鐘無得瞓喎！但佢都話唔少選民習慣晚飯後先投票，認為可以取個平衡，先試行提早半個鐘結束投票時間咁話。
不過泛民就好似有唔同意見，議員郭家麒就表明不支持。政制事務局局長聶德權就話知道香港投票時間比唔少地區長，但已經實行多年，但佢亦話會持開放態度對待調整投票時間。