政情：籌款朝三暮四守護基金又搬龍門

只顧撤職四人 犧牲佔中三子

「守護公義基金」舊年年底嘅初步籌款目標係五百萬元，為咗籌款，民陣與部分政黨將今年元旦日遊行籌款撥入基金，單單元旦日遊行已籌得一百四十多萬元，當時已被批評騎劫遊行兼巧立名目向市民「掠水」，要公眾為佢哋自己搞出嘅「大頭佛」埋單。

基金喺今年六月籌得四百七十二萬港元後，早前平分咗畀姚松炎等人，就突然暫停為該案籌款，大搬龍門，變咗為包括佔中三子戴耀廷、陳健民、朱耀明在內嘅佔中九名被告抗辯籌款，陳健民同朱耀明更因避免利益衝突而退出基金，其時被批評由基金發起人變成受助人，令人質疑佢哋當初發起基金時嘅目的何在。點知，呢個基金將龍門搬完一次，事隔唔夠一個月又再搬多次龍門，喺姚松炎等近日被高等法院裁定宣誓無效，即時喪失立法會議員資格後，「守護公義基金」即時變身，變番幫DQ四人組籌款。

「守護公義基金」信託人及發言人鄭宇碩表示，七一遊行當天，基金已為佔中案被告籌得約九十萬港元，基金今日起暫停為此案籌款，集中支援DQ四人組，日後會視乎佔中案官司嘅進展，再研究是否有進一步籌款嘅需要。

咁樣變嚟變去嘅籌款，其實連捐錢嘅人都搞唔清係捐嚟為乜事同幫邊個，但係受助人就袋袋平安，等公眾為佢哋嘅行為埋單。咁樣睇落，「公義」呢個龍門真係任佢哋搬！