中環出更：一舊雲劉國勳互罵「躝癱」「潑婦」

話說立法會政制事務委員會尋日嘅會議傾到最後階段討論其他事項時，民主黨（白鴿黨）議員黃碧雲（一舊雲）借機向政制及內地事務局局長聶德權詢問現時有六個議席懸空及相關補選事宜，卻意外引發一輪罵戰，一舊雲惡人先告狀罵劉國勳係「躝癱」，劉國勳反指一舊雲係「潑婦」，兩人互罵不休更令會議無法繼續而提早五分鐘休會。

事緣委員會主席廖長江認為一舊雲所提及嘅問題同會議議程無關，而屬民建聯（民記）嘅劉國勳亦唔明點解一舊雲會咁急問補選嘅問題，直言白鴿黨冇需要咁虎視眈眈補選機會，隨即惹起一舊雲強烈不滿。

一舊雲認為劉國勳係猜測佢嘅發言動機，因為佢係會議室內唯一一名白鴿黨議員，而劉國勳則反叫一舊雲唔好「睇得自己咁大」，否認發言係講緊一舊雲，兩人就此爭論不休。

廖長江認為劉國勳發言未有指明一舊雲或提出其他事項嘅議員，唔認為劉國勳有猜測議員動機，一舊雲則反指廖長江有所偏袒，更怒稱「抗議民建聯呢個『躝癱』隨便含沙射影民主黨」。其後佢又稱民建聯「亂噏廿四，不負責任」。

聽到被罵「躝癱」，劉國勳亦不甘落後，指已有人解釋《議事規則》，勸佢唔好再糾纏做「一舊雲」，更將佢嘅行為形容如同潑婦，但言論一出就立即稱收回言論，理由係「唔同呢啲女人鬥」。不過，一舊雲則批評劉國勳侮辱女性，由於兩人毫無停火嘅意圖，結果廖長江提早五分鐘結束會議，為鬧劇畫上句號。

卓妮

中環出更：一舊雲劉國勳 互罵「躝癱」「潑婦」