政情：孫公挺蔡若蓮做副局 撲火恐變撥火

話領導層最緊要識解決問題

孫公話唔太認識蔡若蓮，掌握唔到大部分資料，難以正式回答蔡若蓮係咪勝任，但最重要係有心同有辦事能力，舉例指自己做教育局局長前，亦冇教育經驗，作為領導階層，所需要嘅並唔係專業知識，因為團隊中會有人支援，專業人士會畀專業意見，領導層最重要嘅係要有眼界、視野、經驗同人脈，以及識得解決問題。

會唔會擔心蔡若蓮出任副局長？孫公反問「點解擔心，佢做咗啲乜嘢係我應該擔心嘅呢」，又話「依家又唔係委任佢去做議員，大家都唔同嘢嚟嘅，幾時有話過輸咗選舉唔可以做（副局長）」。

指有人因背景「為反而反」

孫公又話唔知道外界反對嘅道理喺邊度，但自己以局外人嘅身份冷眼旁觀，認為反對者有啲係「為反對而反對」，因其背景同反對者嘅睇法唔同，令蔡若蓮背負「原罪」，形容好可惜。

被問到外界有指蔡若蓮有如「劉江華第二」、「敗部復活」，孫公就話做官員最重要係有冇實力，其他人重視嘅係做唔做到成績，又話蔡若蓮現時仍未工作，點可以覺得佢係做唔到，唔認為要有憂慮。

依家坊間對蔡若蓮出任副局長一事炒得好熱，就連蔡若蓮日前喺一個活動現身都唔敢多講，話：「唔準備去評論關於我嘅討論」，然而孫公尋日咁講似係為蔡若蓮撲火，之但係外界反對嘅聲音陸續有嚟，而孫公仲話有啲人係為反對而反對，會唔會更加激起反對者把火，到頭嚟撲火變咗撥火呢？咁就要睇下後續發展嘞！