香港通街無殼蝸牛，私樓買唔起，公屋輪唔到，劏房成為僅僅好過瞓街嘅無奈選擇，新政府新官上任三把火，以為解決房屋問題有咩靈丹妙藥啦，結果居然係提供更多劏房，你話同飲鴆止渴有咩分別？
運輸及房屋局局長陳帆早排探訪劏房戶後，當場接納團體意見，話考慮支持非牟利機構喺各區承租單位，再分間成劏房以成本價出租畀有需要家庭，又話唔排除政府會撥出啟動資金作單位裝修之用，強調「政策係整出嚟嘅」。
唔理點講都好，局長肯紆尊降貴，訪貧問苦，總好過匿喺冷氣辦公室，拍拍腦袋做決策，家陣最重要嘅問題係，政府同團體合推劏房呢一招，到底係咪可行。有關注團體就講得啱嘞，政府一定要為業主提供更多誘因，除咗裝修費用，最好係提供埋維修津貼以及稅務優惠等，否則都幾難吸引人提供閒置住宅單位租畀社福機構或社企營運，幫助有需要人士。
呢啲就係經驗之談嘞。之前由社福機構營運嘅「光房計劃」，正正就係承租有心業主提供嘅物業，經翻新並提供簡單設施，再分間成細單位租予合資格家庭，由於屬非牟利性質，對市場欠缺吸引力，幾年間受惠人數只有百多戶，相對全港二十萬劏房戶嘅住屋需求，連杯水車薪都談唔上。
有社福機構負責人對新政府從善如流讚不絕口，話即時公開回應好難得喎。實情係之前社福機構盡心盡力幫基層市民搵地方，港產官僚影都冇，依家新政府上場即刻撲出嚟扮晒廣納民意，隨時又係博取掌聲嘅公關騷，之後有冇相應支援同配套，先至係最大考驗。
講開又講，之前港府成日話要嚴厲取締劏房，依家一個屈尾十又將劏房合理化，都咪話唔諷刺。係人都知，好多劏房嘅消防、衞生情況欠佳，危機四伏，早排紅磡唐樓倒塌意外，就係因為有人亂劏單位，一個唔好彩悲劇重演，後果真係不堪設想。
退一萬步講，即使呢類合推劏房真係好似當局所講咁「質素優良」，但裝修幾四正都好，劏房始終都係劏房，今時今日香港作為全球最富裕城市之一，居然倒退番上個世紀《七十二家房客》電影嘅情景，又或者好似七層徙置大廈咁要共用廁所同浴室，官老爺知唔知個「醜」字點寫？
始終都係嗰句，講一萬句漂亮話，不如做一件實事。發展局局長黃偉綸尋日話，增加土地供應，政府並冇「神仙棒」，只能靠「揼石仔」。呢啲官腔熟口熟面，市民過去五年聽埋唔少，旨意官老爺解決問題，睇怕都係慳番啖氣暖肚好過。