政情：公民講場：葉建源被泛民累 教育撥款凍過水

新一屆政府向立法會提出教育新資源撥款，措施包括為就讀自資學士學位課程嘅學生提供每年三萬元資助，有關建議大受歡迎，連屬於泛民嘅教育界議員葉建源都大力支持，希望有關撥款喺立法會休會前獲得通過。不過隨住四名議員被褫奪資格，立法會旋即烽煙四起，財委會連續兩日因民主派喺會上抗議而被迫腰斬，葉建源頓成磨心。佢尋日回應時就冇晒心機，只係話有信心撥款可以獲得通過，又不斷重複話問題好複雜。財委會開會日子所剩無幾，睇怕今次教育界嘅期望隨時化成灰，葉建源有排冇覺好瞓喇！